Камянецкая вежа

Філіял «Камянецкая вежа» заснаваны ў 1969 годзе, размяшчаецца на тэрыторыі унікальнага помніка старажытнарускага абароннага дойлідства XIII стагоддзя. «Стоўп камен» быў пабудаваны паміж 1276-1288 гг.на беразе ракі Лясной дойлідам Алексам па ўказанні валынскага князя Уладзіміра Васількавіча, які вырашыў умацаваць паўночныя межы княства.

Камянецкая вежа знаходзіцца на высокім узгорку, на левым беразе ракі Лясная, на ўскраіне горада Камянца (Брэсцкая вобласць). У плане вежа круглая (вышыня 29,4 м, вонкавы дыяметр 12,5 м, таўшчыня сцен 2,5 м). Унутры падзелена на 5 ярусаў (паверхаў). Над верхнім ярусам размешчаны купальны звод. З 5 яруса на верхнюю пляцоўку вядзе каменная лесвіца-ход, якая праходзіць у тоўшчы сцяны. Вежа мае 14 зубцоў, у падставы якіх размешчана баявая пляцоўка.

Агульная экспазіцыйная плошча музея - 313,2 м². У экспазіцыі, размешчанай у 5 залах на 5 ярусах вежы, налічваецца 335 экспанатаў. На 1-м ярусе прадстаўлены рэканструкцыя эпізоду жыцця вежы ў канцы XIII стагоддзя і трыпціх «будаўніцтва Камянецкай вежы», выкананы мастаком Н. І. Гуршчанкавым. 2-і ярус музея прысвечаны археалагічнаму вывучэнню г. Камянца і Камянецкага раёна. Тут можна пазнаёміцца з археалагічнымі знаходкамі з курганных могільнікаў дрыгавічоў X стагоддзя (скроневыя кольцы, шкляныя пацеры, ганчарныя вырабы і інш.), прадметамі з Гарадзішча Камянец (фрагменты ганчарнага посуду, вырабы з жалеза), убачыць макет-план Камянца і Камянецкай вежы канца XIII — пачатку XIV стагоддзя. 3-і ярус вежы распавядае пра палітычнае, эканамічнае, культурнае жыццё Камянца ў складзе Вялікага Княства Літоўскага (XIV–XVII стст.). Археалагічныя знаходкі, прадстаўленыя тут, сведчаць аб развіцці ў горадзе гандлю, рамёствы, палявання. Асаблівую цікавасць выклікаюць у наведвальнікаў бронзавы ромбашчытковы пярсцёнак канца XIII стагоддзя з Гарадзішча Камянец, партрэтны кафлю сярэдзіны XVI стагоддзя-эпохі італьянскага Адраджэння — знаходка вельмі рэдкая для Беларусі. Яшчэ адна ўнікальная знаходка XII ст. — крыж-энкалпіён, які служыў для захоўвання мошчаў святых. 4-ы ярус прысвечаны развіццю абарончага дойлідства Беларусі ў канцы XIII-пачатку XVII стст., этапам рэстаўрацыі вежы. Зала 5-га яруса паказвае ваенную гісторыю Камянца і Камянецкай вежы. Сцянны роспіс мастака А. У. Пашкевіча адлюстроўвае аблогу горада крыжакамі ў 1378-1379 гг. Тут экспануюцца ўсходнеславянская і заходнееўрапейская зброя XIII-XIV стагоддзяў (мячы, дзіды, арбалеты, калчан са стрэламі для лука і арбалета) і воінскія даспехі (кальчуга, даспех лускаваты, наплечнік даспеха пласціністага, жалезны шлем), рыштунак і даспехі ўсходнеславянскага воіна і заходнееўрапейскага рыцара канца XIV стагоддзя.

На назіральнай пляцоўцы вежы праводзіцца аглядная экскурсія «архітэктурныя помнікі г. Камянца». Амаль з 30-метровай вышыні можна ўбачыць жывапісную карціну сучаснага горада і яго ваколіц.